Pakistan rama lirnghingah mi 20 thi

Pakistan ram chhimlamah an ram huna nimin zing dar 3 vel khan magnitude 5.7-a nain lir a nghing a, lirnghingin chhiatna a thlenah mi 20 an thi a, mi 200 chuangin hliam an tuar tih Disaster Management Authority Director General Naseer Nasir chuan a sawi.

Lirnghing tuarte chhanchhuah hna hi thawh nghal a ni a, lirnghing vanga thi zinga a tam zawk hi hmeichhia leh naupangte an nih thu a sawi bawk. Thi zinga a tam ber hi in leh bang chimin a delhte an ni.

U.S. Geological Survey (USGS)-in a sawi dain lirnghing ṭanna hi Balochistan province khawpui, Quetta khawchhak lam, km 102 vela hlaa lei hnuai km 20 vela thuk a ni.

Lirnghing vang hian lei in (mud house)100 chuang a tlusawp a, in dang eng emaw zat leh sorkar building-te pawh a tichhia tel bawk. Mi 100 chuangte chu chenna in tur nei loin an awm tih Harnai deputy commissioner Sohail Anwar chuan a sawi.

Balochistan province-a Harnai khua chu lirnghing tuar na khua niin, kawng a ṭhat tawk loh vang leh, electricity leh mobile service a mumal loh avangin chhanchhuah hna thawhna kawngah pawh harsatna an tawh phah a ni.

Kum 1935 khan Quetta-ah hian magnitude 7.7-a na lirnghing hian a lo sawi tawh a, mi 30,000 - 60,000 inkarin nunna chanin, Asia chhim lama chhinchhiah theih china lirnghing rapthlak berte zinga mi a ni. Kum 2005, October 8 khan Pakistan-occupied Kashmir-ah magnitude 7.6-a nain lir a nghing vangin mi 73,000 vel thiin, mi maktaduai 3.5 vel chu chenna in nei loin an lo awm phah tawh bawk. Kum 2015, Ocotber thla khan magnitude 7.5-a nain lir a nghing leh a, mi 400 vel an thi leh bawk.