Canada-in sorkar hnathawk vaccine la lo unpaid leave angin kal tir vek dawn

Canada sorkar laipui hnuaia hnathawk, Covid-19 vaccine la lote chu an hnathawh thawh chhunzawm a remti dawn lo a, unpaid leave anga kaltir vek an ni dawn tih a sawi. Hei bakah hian thlawhtheihna, rel leh lawnga zin turte tan vaccine lak ngei a ngai dawn bawk.

Prime minister Justin Trudeau chuan Nilaini khan an policy siam thar hi a tlangzarh a ni. Trudeau chuan an policy thar chu khawvel huap pawh a khauh ber pawl a ni tih sawiin, sorkar hnathawkte chu vaccine la vek tura an phut thu a sawi. "Thil dik taka i tih a, vaccine i lak chuan Covid lak aṭang hian i him thei a ni," a ti.

Canada-ah hian federal service worker 3,00,000 vel an awm a, regulated woker 9,55,000 vel an awm bawk, hengte hi full-time workforce aṭanga 8% vel an ni. Vaccine semchhuah hna hi kalpui chhunzawm zel niin, an ram mipui kum 12 chunglam zinga 80% velin dose kimin an la tawh a ni.

Sorkar hnathawkte hian October 29 thlengin online portal kaltlangin vaccine dose kimin an la tawh ngei finfiahna an tarlan a ngai a, hemi chhunga puanzar hman lote chu an hnaah an kal chhunzawm phal a ni dawn lo a, an chawlh chhung hian hlawh pek an ni dawn lo bawk a ni.