US-in Afghanistan President hlui Ghani chhui chiang dawn

U.S. special inspector general for Afghanistan reconstruction, John Sopko chuan Afghanistan president hlui Ashraf Ghani-a'n an ram a chhuahsan ṭuma pawisa tam tham tak a tlanchhuahpui tel nia sawi chungchang chu an chhui chiang dawn tih a sawi.

August 15-a Taliban-ten Kabul khawpui an luh khan President Ghani hi ram dangah a tlanchhe zui nghal a ni. Ghani chet dan hi an ram politician-te pawhin an sawisel nasa hle a, mahse thisen chhuahna thleng tur a ven theihna kawng awmchhun a nih avanga tlanchhia niin a insawi thung. Kabul aṭanga a tlanchhuah rual hian sum tam tak a chhuahpui nia an puhna chu thu dik lo a ni tih a sawi a, mahse a insawifiahna hi an pawmpui hlawm lo a, hei vang hian Congress chuan Sopko team chu thil awmdan chhui chhuak turin a ti ta a ni.

Sopko chuan house of Represen­tative subcommitte hnenah thil engmah finfiahna a la awm lo thu sawiin, an zirchiang mek tih a sawi. Special Inspector General for Afghanistan Reconstruction (SIGAR) hian America-in Afghanistan-a awmhmun an khuar chhung khan inbumna, leh intihnawmnah thleng chungchangte a lo chhui ṭhin a ni. US hian kum 20 chhung mission a kalpui hnua Taliban ten thuneihna an chan hnuah August thla tawp khan a inlachhuak fel a ni.