Malaysia inthlanah eptute an chak

Malaysia Parliament inthlanpui, Nilaini-a neihah prime minister hlui Mahathir Mohamad-a kaihhruai eptu ṭangrual pawl, Pakaran Harapan an chak a, kum 60 chhung zet Barisan Nasional (BN) kaihhruai ṭangrual sorkar lo ding tawh chu an paihthla dawn ta a ni.

Mahathir Mohamad kaihhruai eptu ṭangrualte hian Parliament seat 222-ah seat 113 an la a, majority an nei pha a ni. Prime Minister Najib Razak kaihhruai BN hian seat 79 chauh an la pha thung.

Kum 92 mi Mahathir hi Prime Minister atan lakluh ani nghal dawn a, khawvela prime minister zinga upa ber a ni ang.

Kum 10 dawn Malaysia ram hruaitu dinhmun lo chelh tawh, PM Najib Razak chuan mipuite duhthlanna chu a pawm thu leh, an chak lo pawh a pawm thu a sawi. Najab Razak leh a thurualpuite hi kum 2009-2014 inkar khan 1MBD investment fund tam tham tak ru-ah puhin, investment fund zinga dollar maktaduai 700 zet chu Najib-a bank account-ah dah niin US Justice Department chuan a lo sawi tawh a ni. Hei vang hian a hming a chhiain a larna pawh a tlahniam hle a, mahse Razak chuan tih dik lo a nei lo niin a sawi thung.

Najib Razak-a kaihhruai BN hi a larna tlahniam mah se, tun ṭum inthlanah hian chak tura rin kai an la ni reng tho a, eptu pawl Pakatan Harapan in hnehna an chang hi tumahin an ringlawk lo a ni. Eptu lamten hnehna an chan theihna chhan ber chu Mahathir vang nia ngaih a ni.

Mahathir kaihhruai eptu ṭangrual pawlah hian prime minister a nih laia eptute pawh an tel a, an zingah hian eiruk leh mahni anpui kawpa puh vanga thiam loh chantir a deputy hlui Anwar Ibrahim pawh a tel. Anwar hi kum nga tang tura hrem a ni. Mahathir chuan hnehna an chan hnuah chanchinthar lakhawmtute a kawmnaah jail-a tang mek Anwar hi ngaihdam a nih theihna turin theihtawp a chhuah dawn tih a sawi.