Nobel Peace Prize dawng turin journalist pahnih thlang

Khawvel chawi­mawina ngaihhlut, Nobel Peace Prize 2021 dawng turin journalist pahnih, Philippines mi Maria Ressa leh Russia mi Dmitry Muratov-te thlan an ni.

Heng mi pahnihte hi miin an ngaihdan tilang tura zalenna a neih, freedom of expression hum­halhna kawnga anmahni ram ve ve huaisen taka an beihna avangin chawi­mawina dawng tura thlan a ni.

Nimin khan Nor­wegian Nobel Committee chair Brit Reiss-Andersen chuan chawimawina dawng tur hi a puang a ni. Nikum khan Nobel Peace Prize hi World Food Program hnenah hlan a ni.

Nobel Prize hian gold medal bakah Swedish pawisa, kronor maktaduai 10 (USD mt 1.14) a keng tel. Peace Prize tih loh, Nobel Prize dang dawngtute hi December 10-ah Stockholm, Sweden-ah hlan an ni ṭhin a, Nobel Peace Prize dawngtute erawh chu hemi ni vek hian Oslo, Norway-ah hlan an ni ṭhin thung.

Nobel Prize in Literature
Nobel Prize in Literature, 2021 dawng tur chu Ningani tlai khan puan a lo ni tawh bawk a, Tanzanian novelist Abdulrazak Gurnah chu chawimawina dawng tur hian thlan a ni.

Kum 79 mi, Gurnah hi 'Paradise' leh 'Desertion' novel ziaktu niin English in a ziak ṭhin a, Britain-ah a cheng mek a ni. Colonialism-in a nghawng hrang hrangte chiang taka tarlang a, gulf rama refugee te dinhmunte a zirchianna leh tarlanna avangin he chawimawina hi hlan a ni dawn tih Nobel Committee chuan a sawi. Sub-Suharan Africa aṭanga Nobel Prize for Literature dawng thei pahnihna a ni dawn a, a hmasa ber chu kum 1993-a dawngtu Toni Morrison kha a ni.

Nobel Prize hi economics lama dawng tur tih loh chu puan kim an ni tawh a, Nobel Prize in economics dawng tur hi kar leh Thawhṭanniah puan a ni ang.