Iran-in TV-ah hmeichhiate pizza ei lai tihlan khap

Iran sorkar chuan an rama hmeichhiate khuahkhirhna dan thar siamin, TV-ah hmeichhiaten pizza an ei lai leh, hnathawhna hmuna mipaten hmeichhiate thingpui an pe lai tihchhuah a khap.

Iranwire-in a tarlan danin, hmeichhiate chu sandwich leh pizza an ei lai bakah, in tur lam rawng sen lam hi an in lai tihlan khap a ni a, hei bakah hian TV-ah hmeichhiaten leather kutkawr an bun lai tihlan khap a ni bawk.

Hmeichhia leh mipa awmho lai thlalak pawh mipui nawlpui hmuh tura tihchhuah a nih hmain Islamic Republic of Iran Broadcasting (IRIB) director-ten an enfiah phawt a ngai ang. IRIB public relations hotu, Amir Hossein Shamshadi chuan heng kaihhruaina tharte hi pawl kal dan phung ennawn a nih hnuah siam a ni tih a sawi.

Iranian talk show, Pighsoo-ah chuan hmeichhe lemchan thiam, Elnaz Habibi chu TV-ah tilang loin a aw ri chauh tihchhuah a ni. Hei hian sawisel pawh a hlawh hle a, sawiseltu pawh an tam hle. "IRIB aṭanga kan hmuh zawng chu a lem tel loa ṭawng ri chiah a ni," tiin veteran actor Amin Torokh pawh sawiseltu zingah hian a tel.