WHO-in NKorea-ah Covid-19 damdawi thawn dawn

World Health Orga­­nisation (WHO) chuan North Korea tan Covid-19 damdawi leh mamawh dangte chu China lawngchawlhna, port Dalian kaltlangin an thawn dawn tih monitoring report a tihchhuah tharah a tarlang.

UN body chuan, "DPR Korea ṭanpuina atan Covid-19 damdawite chu China-a Dalian port kaltlangin thawn chhuah ṭan a ni," a ti.

WHO chuan Sep­tember thla tawp thleng khan North Korea chuan an ramah Covid-19 hri kai an la awm lo tih a report thu a sawi. September 23 thleng khan mi 40,700 test tawhin, an zingah hian health care worker-te pawh an tel. Flu symptom neihte pawh test an ni a, mahse an vaiin an negative vek niin NKorea chuan WHO hi a hrilh a ni.

Covid-19 hri a len ṭan tirh lam, nikum January thla aṭang khan NKorea hian ramri a khar nghal vek a, hri dona atan inkhuahkhirhna khauh takin a kalpui nghalin, an hmalakna hi ram leh hnam chhanhimna tur a ni thu a sawi. Mahse hei hian an ram ei leh bar dinhmun pawh nasa takin a nghawng zui a ni. Hetichung hian NKorea hian ram dangte hnen aṭangin chhawmdawlna engmah a dawng duh lo a, an ram ṭhianṭha China leh Russia hnen aṭang pawhin vaccine a dawng duh lo a ni. China hian an rama vaccine siam, Sinovac chu Covax programme kaltlangin NKorea-ah thawn a tum a, mahse NKorea chuan lo hnialin hri leng tuar nasa zual ramah thawn zawk turin a ti. Kumin July thla khan Russia chuan a thlawnin Sputnik leh AstraZeneca vaccine pek an tum ve leh a, hei pawh hi NKorea chuan alo hnawl leh bawk.

North Korea rama television chuan US leh Europe-a vaccine la zingah taksa lama harsatna nei an awm tih uar takin an tarlang a, hei hi mithiamte chuan an ramin vaccine an lak duh loh vanga an chhuanlam anih thu an sawi thung.