Germany Chancellor Merkel-in Israel a tlawh

Germany Chancellor kalchhuak tur, Angela Merkel chuan Israel ram tlawhin, nimin khan Holocaust memorial a tlawh a, prime minister Naftali Bennett nen meeting an nei bawk. Kum 16 chhung Germany ram hruaitu a nih hnuah Chancellor a nihna anga Israel a rawn tlawh hnuhnun ber tur a ni.

Kum 2005-a thuneihna a chan hnuah, Merkel hi Israel-ah hian ṭum riat a zin tawh a ni. Indopui II-na hnuah Germany sorkar chuan Israel nena inzawmna ṭha siam tumin theihtawp an chhuah hlawm a, Merkel pawhin a security leh economy lama thawhdunna ṭha zawk siam turin a bei a, Germany hi Israel-in sumdawnna lama a thawhpui lian ber zingah a tel mek.

Kum 67 mi, Merkel hi trained physicist a ni a, nimin khan Israel hmarlam Haifa-a Israel Institute of Technology, Technion chuan honorary doctorate an hlan. Merekel hi August thla chawhnu lama zin tum a ni a, mahse Afghanistan tualchhung buaina thleng leh, German mite hruai chhuah hna thawh a ngai vangin a zin hun hi a sawn hla a ni.

September 16-a Germa­ny inthlanpui neihah khan Merkel-i kaihhruai Christian Democrats chu an chak zo lo a, Social Democrats chuan party dangte thawhpuiin ṭangrual sorkar an siam dawn a ni.