Iraq Parliament inthlanpui nei a ni

Iraq Parliament inthlan chu mi tam takin an boycott chungin nimin khan neih a ni.

Parliament seat 329 inthlan neihah hian party 167-ten chuhin, candidate 3,200 chuang an awm. Candidate zingah hian hmeichhia 950 an awm bawk. Parliament seat hmun lia ṭhena hmun khat hi hmeichhe tana dah niin, seat pakua chu minority - Kristian leh Yazidis tana dah a ni bawk.

Inthlan hi a hun tur aia thla eng emaw zata hmaa buatsaih a ni a, kum 2003 hnua Parliament inthlan an neih ṭum nga-na a ni. Vote nei mi maktaduani 25 chuang an awm bawk.

Zirtawpni khan security force, mi tang leh buaina avanga ramchhung hmun danga awm mekte chu ballot hmangin vote thlak hmasak tir an ni. Hetih lai hian Iraq sorkar hnathawh dan leh, eiruknaa a inhnamhnawih danah mi tam tak chu lungawi loin, vote an thlak duh lo. Official-te chuan kum 2018 inthlanpuia vote tla, 44.5% aiin kumin inthlan vote tla hi a chhiat zawk an ring tih an sawi.