Rohingya raltlante sawn turin UN leh Bangla-desh-in inremna ziak

United Nations (UN) leh Bangladesh sorkar chuan Myanmar ram aṭanga Rohingya raltlan, Cox Bazar district-a refugee camp chep taka awm mekte Bhasan Char island-a sawn chhuahna kawnga thawhdunna turin inremna an ziak.

Bangladesh-ah hian Rohingya raltlan hi nuai sarih chuang an awm mek a, an zinga a tam zawk chu Cox Bazar district-a refugee camp-ah an awm hlawm a ni. Bangladesh sorkar chuan heng camp-a awmte hi an chep avangin an zinga nuai khat vel chu Bhasan Char island-ah sawn a tum a, mi 19,000 chu a sawn chhuak tawh.

Raltlante sawnchhuah tumna hi UN leh humanitarian group hrang hrangte chuan an sawisel a, sawnchhuah an tuma Bhasan Char island chu fur laia tuiin a chim reng a nih avangin chenna atana a tlak loh niin an sawi. Mahse prime minister Sheikh Hasina kaihhruai sorkar chuan he thliarkar hi USD mtd 112 chuang zet sengin a chei ṭhat thu leh, hospital, school leh mosque-te pawh din a ni a, khawsakna hmun atana hmun hrehawm a nih tawh loh thu a sawi. March thla khan UN team chuan he thliakar hi tlawhin, raltlante awmna tur atan pawh an pawmpui ta a ni.

UN leh Bangladesh sorkar hian Inrinni liam ta khan inremna hi ziakin, thla thum chhungin raltlan 81,000 chu Bhasan Char island-ah hian sawnchhuah belh leh an ni ang.