Kim Jong-un-a'n hneh theih loh tur sipai din a tiam

North Korea ram hotu, Kim Jong-un chuan United States nena inepna tawp thei loh an neih karah an ram tan tuma hneh theih loh tur sipai din a tiam tih state media chuan a tarlang.

Kim Jong-un hian an ralthuam siamte chu indona tura siam ni loin an ram venhimna tura siam a ni tih a sawi bawk.

North Korea hian tunhnai khan hypersonic leh anti-aircraft missile an enchhin nia sawi a ni a, hei vang hian sawisel pawh a hlawh hle a ni. Hetih lai hian South Korea lam pawhin anmahni siam submarine-launched weapon an enchhin ve bawk.

NKorea khawpui, Pyong­yang-a Self-Defence 2021 exhibition-a thu a sawiah Kim chuan hneh theih loh tur sipai din a tiam a, South lama sipai indin chho mek chungchang pawh sawichhuakin North Korea chuan an ram ṭhenawm nena inhmuh thiam lohna neih an duh loh thu a sawi.

"Ramdang nen indo lam kan sawi lo, mahse indona thleng thei tur lakah kan inveng a, ram venghim turin hma kan la a ni," a ti. Kim hian North leh South Korea inkara buaina chawkchhuakah US a puh bawk.

President Joe Biden kaih­hruaina hnuaiah United States hian North Korea nena inbiak an duh thu a sawi chamchi a, mahse a hrekna siamte a hlih hmain NKorea chu nuclear ralthuam a siam leh neihte tihtawp turin a phut hmasa thung a, hei hi NKorea lam chuan a pawm thei bik lo a ni.

NKorea hi United Nations chuan ballistic missile leh nuclear weapon enchhin a khapsak bawk. Mahse heng khuakhirhna siamte hi a bawhchhe fo a, hei vang hian sawisel pawh a hlawh fo a ni. Hetih lai hian NKorea chuan an ram vehimna turin ralthuam siam leh tihchangtlun hi a ṭul tih a sawi thung.