Covid inkaihhruaina bawhchhiaa puhna Suu Kyi-in a pha

Myanmar hotu aṭanga sipaiten'a an nekchhuah tak, Aung San Suu Kyi leh President hlui Win Myint-te chuan Covid-19 inkaihhruaina dan bawhchhiaa sipai sorkarin a puhna chu an pha tih a lawyer-te chuan an sawi.

Hruaitu pahnihte hi nikuma inthlanpui an neih dawn khan hripui leng vanga khuahkhirhna siamte an bawhchhia nia sawiin, Disaster Management Act hnuaiah thubuai pahnih ve ve siamsak an ni. Heng thubuai pahnihah te hian thiam loh an chan chuan kum thum thleng lunginah tantir theih an ni ang.

Naypyitaw-a special court chuan phalna nei loa ram dang aṭanga walkie-talkie la lut leh, license nei loa radio hmang te, thu dik loa midangte fuiha Suu Kyi puhna dangte pawh a ngaihtuah tel bawk. Buaina chawk chhuak thei zawnga thu sawia an puhna hi Suu Kyi, Win Myint leh Naypyitaw mayor hlui Mao Aung-te chuan thla hmasa khan a dik loh thu an lo sawi tawh a ni.

Suu Kyi lamṭang leh independent analyst-te chuan an puhna te hi thu dik lo, Suu Kyi-tihhmingchhiat tuma hmalakna leh sipai rorelna chawikan tumna a nih thu an sawi.

Suu Kyi hi eiruk thubuai siamsak a ni bawk a, thiam loh a chang a nih chuan kum 15 thleng lungin a tang thei dawn a ni. Official Secrets Act bawhchhia an puh avangin fiahna a hmachhawn dawn bawk a, hetah hian thiam loh a chang leh a nih chuan kum 14 lungin tang tura hrem theih a ni dawn bawk.

Thawhṭanni khan judge chuan kum 76 mi Suu Kyi-in kar khata trial vawi khat a neih ṭhin chu kar hnih dana sawn sak tura a dilna a hnawlsak. Suu Kyi hian court-a inlan a ngaih zing lutuk avanga taksain a chauh phahte chu a ziaawm theih deuh a beisei thu a sawi.

Suu Ky-i lawyer, Kyi Win pawhin kar tina court-a inlan ngai ziah chuan Suu Kyi hi a tichau ve ṭhin hle a, a lawyer-te ngei pawh an hah tih a sawi. Hei vang hian kar hnih danah inlan tir turin an ngen a, mahse judge chuan a remti lo a ni, a ti.