Trump-Kim summit : June 12-ah Singapore-ah neih dawn

US President Donald Trump leh North Korea hotu Kim Jong-un ten meeting an neihna tur hmun leh hun chu tihfel a nih hnuin puanzar a ni ta. June 12-ah ram pahnih hruaitute hian Singapore-ah meeting hi an nei dawn a ni.

President Donald Trump chuan a twitter-ah Kim Jong-un nena an inhmun hun tur leh a hmun hi a tarlang a, khawvela remna leh muanna a awm theihna tura meeting hlawhtling tak nei turin theihtawp an chhuah dawn tih a sawi.

US leh NKorea te hi kawng hrang hranga in vauin an inhrosak khum a, mahse March thlan khan North Korea hruaitu Kim-an US president nena inbiakna neih a duh thu a sawi chu President Trump chuan a pawm thu a sawi a, hei hi khawvel pawhin mak a ti hle a ni.

Ram hruaitu pahnihte inbiakna neih tura atan thil ṭul leh pawimawhte buaipuiin US Secretary of State Mike Pompeo chuan NKorea tlawhin Kim nen pawh an inkawm a ni. Pompeo-a cham lai hian NKorea chuan boruak siamṭhatna tura kawng khat atan America mi pathum a mante pawh a chhuah nghal bawk.

NKorea-in a chhuah, America mi pathumte hi an ram lamah thawn kir nghal niin Ningani zing khan US an thleng a, President Trump chuan Maryland-a Joint Base Andrews-ah a lo hmuak a ni. Trump chuan summit neih hmaa NKorea hruaituin America mi pathumte a chhuah chu thil ṭha leh lawmawm tak a nih thu sawiin, Kim Jong-un chungah pawh lawmthu a sawi.

Trump hi US president ṭanglai zingah NKorea hotu nena meeting nei hmasa ber tur a ni a, meeting-ah hian NKorea nuclear weapon programme chungchang chu an thu ngaihtuah pui ber tura rin a ni. NKorea nuclear programme vang hian Kim leh Trump-te hi kum 2017 khan an in ngur nasat phah hle. Kum 2006 aṭang khan NKorea hian ṭum ruk nuclear test a nei tawh a, hei vang hian US bakah khawthlang ramdangte chuan na taka sawiselin, an ram hrekna pawh an siam phah a ni. Mahse NKorea chuan an ram himna turin heng nuclear ralthuamte hi a mamawh niin a sawi thung. Mahse tun hnaiah Kim Jong-un chuan nuclear test leh intercontinental ballistic missile enchhin chu a tihtawp tur thu leh, nuclear test site-te pawh a khar tur thu a sawi a ni.

US expert-te Trump-Kim summit neihna tur hmun leh hunte hi uluk taka an ngaihtuah thu leh, party hrang hrang pawhin an remtih tlan thu a sawi. Meeting neihna tura Singapore thlan anih chungchang zawhna chhangin, White House Principal Deputy Press Secretary Raj Shah chuan Singapore chu US leh NKorea nen pawhan inlaichinna ṭha tak nei a nih thu a sawi.