Malaysia PM thar atan kum 92 mi Mahathir lalut

Malaysia ram inthlanpui neih zawh taka hnehna changtu, eptu ṭangrual pawl hruaitu Mahathir Mohamad, kum 92 mi chu Ningani zan khan Prime Minister tan rinawmna thu tiamtira lakluh a ni. Khawvela ram khat hruaitu ṭanglai zinga upa ber a ni.

Mahathir Mohamad-a kaihhruai eptu ṭangrual pawl, Pakatan Harapan hian Parliament lower house inthlanah khan seat 222 aṭangin seat 113 an la a, majority an nei pha a ni. Rorellai, prime minister kalchhuak Najib Razak-a kaihhruai Barisna National, kum 60 zet Malaysia rama thuneihna lo chang tawh chu an paihthla a ni.

Prime Minister thar lakluh inkhawm hi national palace-ah neih a ni a, Malaysia lal King Sultan Muhammad V pawh a tel a ni. Mahathir Mohamad hi a nupui Siti Hasmah Mohamad Ali bakah ṭangrual pawl hruaitu dangten an ṭawiawm. Mahathir-an deputy prime minister atana dah a tum, Wan Azizah Wan Ismail pawh a tel.

Lakluh a nih hnua chanchin thar lakhawmtute a kawmnaah, Mahathir chuan amah ngei pawhin inthlan result chu a rin phak bak a ni tih a sawi a, Malaysia mipuiten an thlawpna avanga a lawm thu a sawi. Kum 22 zet prime minister hlui a lo nih tawh aṭanga a tawnhriat aṭangin an ram hruai tur chuan a tling tawk tih a sawi a, sorkar ṭha leh rintlak din a tum thu a sawi. Ṭangrual pawl hnuaia an thawhpui party dang hruaitute biain, minister chanpual insem dan turte an rel ang a, a cabinet thar pawh siam thuai a nih tur thu a sawi bawk. Mahathir chuan eptu hruaitu leh a deputy hlui jail-a tang mek, Anwar Ibrhaim chu ngaidam turin an lal hnenah pawh a ngensak leh dawn tih a sawi a, Anwar hi ngaihdam a chhuah zalen a nih chuan kum hnih chhungin prime minister nihna hi a kuta a hlan tur thu a sawi. Anwar hi mahni anpui kawpa puh a nih avangin jail-ah a tang mek a, June thla hian a chhuah beisei a ni.