NKorea-in May thla chhungin nuclear site tihtawp a tum

North Korea chuan an rama nuclear test site chu May thla chhungin titawp tura hma lak ṭan a ni dawn tih a sawi.

NKorea state news agency KCNA in a report danin, May 23-25 inkar hian nuclear test site, Punggye-ri site kharna hun buatsaih tum a nih thu a sawi. Rorellai Workers’ Party of Korea (WPK) chuan nuclest test-na hmunte kharin, missile enchhin ṭhin pawh an bansan dawna, an ram sum leh pai dinhmun siamṭha turin theihtawp an chhuah tawh zawk dawn niin a sawi. Hetih lai hian scientist-te chaun nikum September thla khan NKorea nuclear test site hi a chhe ṭhen tawh a, a hman tlak zui tawh lo niin an sawi.

April thla khan NKorea ram hotu lu ber, Kim Jong-un chuan May thlaah nuclear test site hi a khar tur thu a sawi a, a kharna hun buatsaih pawh hi enfiah turin South Korea leh US-a nuclear expert-te pawh a sawm a ni.

Punggye-ri site khar hun tak tur sawichian a ni lo a, khaw awmdan azira kalpui a ni ang. He site tihtawp turah hian tunnel-te chu puakthei thil hmanga tihchhiat vek niin, obsevation facility, research building leh security post-te pawh tihchhiat vek a ni ang. He site tihchhiat tur langtlang taka kalpui a, a hmun ngeia enfiah leh thlirpui turin South Korea, China, US, UK leh Russia journalist-te pawh a sawm bawk. Hemi rual hian sawm bik ram a neih chhan chu a test site hi a hmun hma a zim vang leh, a awmna hmun a chhengchhiat vang niin a sawi.