Airlines-te sum hloh tur US dollar vbc 84
International Air Transport Association forecast (IATA) chuan Covid-19 vangin kumin chhunga khawvel Airlines hrang hrangte pawisa hloh zat tur chu US dollar vaibelchhe 84.3 vel a nih tur thu a tarlang.
Hri leng vang hian khawvela Airlines tam zawk chu thlawk thei loin an thlawhtheihnate ṭumhmunah an awm mek a ni. Kumin chhunga Airlines ten net profit margin an hloh tur hi -21.1% a nih thu IATA chuan a tarlang bawk.
Nikum khan Airline industry chuan revenue-ah US dollar vbc 838 a la lut a, kumina he industry-in a hloh tur zat hi US dollar vbc 419 a ni dawn tih IATA chuan a tarlang a, an hloh tur zat hi nikum nena khaikhin chuan 50% a ni. He hri leng vang hian nakkuma Airlines-ten sum an hloh tur zat hi IATA chuan US dollar vbc 15.8 a nih tur thu a sawi lawk bawk a ni.
Kumina hri leng vanga Airlines-te harsatna an thawh ang hi a la awm ngai lo a, nitin US dollar maktaduai 230 vel an hloh ziah ang a ni a, a vaia an sum hloh tur hi US dollar vbc 84.3 a tling pha daih a ni, tiin IATA Director General leh CEO, Alexandre de Juniac chuan a sawi.
IATA hian kumin chhunga passanger vbc 2.2 aṭanga an zirchianna aṭanga sawi lawk a ni a, chawh rualin Airlines-te hian an passenger 37.54% an hloh anga chhut a ni. IATA hian khawvela Airlines 290-te dinhmun tur hi a sawi lawk a, heng Airlines-te thlawhtheihna hi khawvel a thlawhtheihna thlawk zawng zawng aṭanga 82% a ni pha a ni.