Mipuite himna turin a theih ang angin kan bei zel ang : SAfrica President

South Africa president Cyril Ramaphosa chuan Covid-19 laka an ram mipuite an himna turin sorkar chuan a theih ang angin hma lain a bei zel dawn a ni, a ti. 

President Ramaphosa chuan an ramah Covid-19 vanga nunna chan mi 1,080 an awm tawh tih sawiin, an chhungte a tawrhpui thu a sawi. An tan chakna, huaisenna leh beiseina a dilsak tih a sawi bawk. 

Hripui leng mek avang hian SAfrica sorkar chuan thil dang zawng zawng aiin nunna a pawimawh zawk tia sawiin, kharkhipna khauh tak a kalpui a ni. Mahse he khuahkhirhna siam avang hian economy lam a nghawng nasa a, hnathawk thei loa an awm avangin mi tam takin an sawisel a, thil ṭha aiin ṭha lo a thlen tam zawk tiin sorkar pawh an nawr a ni. Hei vang hian hian May 1 lockdown level five chu level four-ah tihniamin, khuahkhirhna ṭhenkhat thlahdul chhoh a ni a, June 1-ah level three-ah tihniam lehin sumdawnna hmun tam zawk hawn phalsakin, mi maktaduai riat vel chuan hna a thawk chhunzawm leh a ni. 

Kharkhipna kalpui chungchanga sawiselna te chu chhangin, President chuan he hun hi health system thuam chakna atan te hman a ni, a ti. Mahse mipuite an fimkhur loh a, hri a darh chho zel a nih chuan an in lo inbuatsaihna te chu a thlawn mai a ni dawn tih sawiin, South Africa mipuite chuan sorkarin kaihhruaina dan a siamte ṭha taka an zawm a, hri darh tur venna kawnga fimkhur taka an awm reng a ngai a ni, a ti.