NKorea-in SKorea nena meeting neih tur ṭhulh Trump-Kim summit ṭhulhah vau

North Korea chuan US leh South Korea sipaiten South Korea-a nunchan an zirho leh avangin nimina Korea ram pahnihten high-level talk an neih tur chu a thulh a, hemi rual hian June 12-a US President Donald Trump leh NKorea hotu Kim Jong-un ten meeting an neih tur pawh ṭhulhah a vau zui bawk.

NKorea official Korean Central News Agency (KCNA) chuan South Korea ram hmun hrang hrangah US leh SKorea sipaite hian nunchan zir chu Korean Peninsula-a boruak muanawm a awm theihna tura hmalak mekna nen a inmil lo, Panmunjom-a ram pahnih aiawhten thuthlung an lo siam tawh, Panmunjom Declaration palzutna a ni, a ti. Hei vang hian June thlaa US leh NKorea hruaituten meeting neih an tum pawh kaltlangpui a ni dawn nge ni dawn lo hriat theih a ni lo tih a sawi a, US chu hemi chungchang hi ngun taka ngaihtuah leh turin a ti a ni.

Hetih lai hian US State Department chuan June 12-a Singapore-a Trump-Kim summit neih tura atan inbuatsaihna chu ruahman anga kalpui zel a nih tur thu a sawi. State Department thupuangtu Heather Nauert chuan, "Kim Jong-un chuan a hmain US leh SKorea sipaiten joint exercise an neih chu chhunzawm zel a ṭul dan a hriatthiam thu alo sawi tawh a ni. Hei vang hian meeting neih tur pawh hi ruahmanna kalpui zel a ni ang", a ti. NKorea-in meeting neih turah ngaihdan dang a nei leh nia sawi chungchangah US chuan hriattirna engmah a dawng lo tih a sawi.

Nimina Korea ram pahnihten high-level talk an neih tur hi April 27-a inbiakna an neih ṭuma inremna an lo siam tawh, a taka kalpui chhoh dan ngaihtuahna tura tih a ni a, mahse inbiakna neih dawn tepah NKorea hian a ṭhulh leh ta a ni.

US leh South Korea sipaite hian air combat drill an nei a, hetah hian US steath fighter leh B-52 bomber-te hman a ni. Hei hi NKorea chuan sawiselin, he thil hi an ram an runluihna nia an ngaih avangin inbiakna neih tur hi ṭhulh mai a ngai ta niin a sawi.