Turkey leh Israel-in palai inhnawhchhuah sak

Gaza Strip ramri-a Thawhṭannia Palestinian mipui nawrh huaihawt leh Israel security force-te inbeihnaah Palestinian mi 60 an thi a, he thil thleng vang hian Turkey chuan a rama Israel ambassor awm chu a hnawtchhuak a, hemi hnu hian Israel chuan Turkey ambassor chu a hnawtchhuak zui ve nghal bawk.

Turkey President Tayyip Erdogan chuan Thawhṭannia Gaza ramri-a Israel sipaite silai kah avanga Palestinian mi tam tak thihna thleng chu kum 2014-a Gaza indona thlen hnua ni khat thilthua thisen chhuahna thleng rapthlak ber leh, mihring insuatna niin a puh a, Israel chu firfiak ram, terrorist state tiin a sawi bawk. Turkey chuan Palestinian mi thite hi ni thum chhung a sun dawn a ni. Turkey President chuan Palestinian mite beih an nih vang hian Muslim ramte chuan Israel nena inzawmna an neihte chu an ennawn a ngai a ni, a ti.