Myanmar President-in Bang tura nawrna a hnial thu a sawi
Myanmar president hlui Win Myint chuan thla riat liam taa sipaiten a kaihhruai sorkar thuneihna an hnehchhuh ṭum khan, sipaiten bang tura an tih chu hnialin, thih pawh a thlang zawk tih thu a hrilh niin a sawi.
Sipaiten February 1-a thuneihna an hnehchhuh hnuah Win Myint leh state counsellor Aung San Suu Kyi-te chu sipaite hian pawn chhuak thei loin an hreng zui nghal a, thubuai pawh an siamsak bawk. Thubuai an siamsak zingah hian mipuite tichiai leh buaina chawk chhuak thei zawnga thu dik lo sawia puhna pawh a tel. He thubuai chungchang hi Thawhlehni khan Naypyitaw-a special court-ah ngaihtuah a ni.
Thubuai ngaihtuahnaah hian media mi leh mipuite an tel phalsak a ni lo a, Win Myint thusawi hi a lawyer Khin Maung Zaw chuan sawichhuakin, hei hi mipuite hriat tura a thusawi puanzar hmasak ber a ni bawk.
A lawyer-in Win Myint thusawi a sawi chhawn danin, February 1 zing khan senior army officer pahnih chuan a room-ah luhchilhin a hriselna ṭha tawk loh chhuanlama hmanga President a nih na aṭanga banna thehlut turin an ti a ni. Mahse a ni hian lo hnialin, a hriselna a ṭhat tawk thu a lo sawi thung a, hemi hnu hian officer-te hian an thu a zawm duh loh avangin harsatna a tawh phah dawn tih an hrilh zui a ni. Win Myint chuan amah vautu sipai officer-te hnenah hian an thu anga awm ai chuan thih pawh a thlang zawk tih a hrilh thu court-ah a sawi a ni.
Win Myint hian sipai thu a zawm duh lo a, President a nihna aṭanga a bang duh tak loh avangin sipaite hian army office hlui, vice president Myint Swe chu hemi ni vek hian acting president an ruat nghal a ni. Myhing Swe hian ram pumah state of emergency puang zui nghalin, he dan kengkawh tur hian sipaite hnenah thuneihna a hlan nghal bawk. Hemi ni aṭang hian Myanmar chu sipai rorelna hnuaiah a awm zui ta a ni.
Thawhlehnia court-a a inlan hian Win Myint chuan sipai lamin an puhna te chu thu dik lo a nih thu a sawi a, ama hminga thuchhuah awm nia sawite pawh a hriatpui loh thu a sawi bawk.
February 1-a sipaiten civil sorkar thuneihna hnehchhuh aṭang khan ram chhung hmun hrang hranga sipai rorelna duh lohna hi lantir a ni a, nawrh huaihawt leh sipaite inbeiin tharum thawhna a thleng fo a, mi tam takin nunna an chan tawh bawk a, sipai lamah pawh thi eng emaw zat an awm tawh bawk.