EU-in Afghanistan tan ṭanpuina pe dawn

European Union chuan tualchhunga buaina lian tak hmachhawn mek Afghanistan-a mihring khawsak dinhmun chawi­kan nan leh ram inrel­bawlna kawnga pui turin euro tluklehdingawn khat ($ tld 1.15) an pe dawn tih bloc chief Ursula von der Leyen chuan a sawi.

EU-in Aghanistan mipuite chhawmdawlna tura pek a lo tiam tawh, USD mtd 346 bakah USD mtd 288 pek belh leh a ni dawn, a bak chu Taliban-te rorelna hlaua tlanchhiate lo dawngsawngtu an ṭhen­awm ramte hnenah pek a nih tur thu a sawi bawk.

Italy-a virtual hmanga G20 summit neih­ah Afghanistan mipuite leh security din­hmunte sawiho a ni a, Von der Leyen hian chhawmdawlna pek an tiam thu hi a sawi a ni.

August thla khan Taliban-ten thuneihna an lak hnuah G7 meeting neihah, Italy prime minister Mario Darghi chuan khawvel ram thiltithei zawkte chu Afghanistan chungchang hi ngaihven a, zau zawka sawiho turin a lo ngen tawh a ni. G20 ram zingah hian US, EU, China, Turkey, Russia, India leh Saudi Arabia pawh an tel.

Von der Leyen chuan EU-in chhawmdawlna sum an pekte hi Afghan mipuite tan chauha ruahman a nih thu leh Afghanistan-a chhawm­dawl hna thawktu, inter­national organisa­tion-te hnenah pek an ni dawn a, Taliban sorkar hnenah pek a ni dawn lo tih a sawi.

"Afghanistan-ah retheihna leh ṭampui a tlak loh nan theihtawp kan chhuah a ngai a, a rang thei ang bera kan chet a ngai," tiin Von der Leyen chuan thlasik lo thleng tur thlir lawk chungin a sawi.

Afghanistan tana chhawm­dawlna an pek tur hian health lama sum hman tur pawh tam zawk a awmtir thei dawn a, hetih lai hian an ṭhenawm ramte hnena an pek tur erawh chu raltlante enkawlna, firfiaka chetna dona kawnga thawhhona ṭha zawk siamna tur leh, dan phal loha thil tawlhruk ṭhin dona atante hman a ni ang.

Taliban-te hian sorkar thar an siam hnuah Thawhlehni khan a ṭum khatna atan Qatar-ah EU-US joint team-te chu hmaichhanah inbiakna an neihpui bawk.

Ram hrang hrangten Afghanistan tana chhawm­dawlna an pek ṭhin chu Taliban-ten thu­neih­na an chan hnu hian a titawp vek a ni. Ram danga Afghanistan sorkar hminga thil an neihte pawh khawih chet theih loin an hreksak hlawm nghal bawk. Hetih lai hian ram chhungah thil man a sang chak hle a, mi tam takin harsatna an tawk mek a, thlasikah mipuite dinhmun hi a chhiat zual zel hlauhthawnna a nasa hle a ni.

UNICEF Deputy Executive Director Omar Abdi chuan Taliban ten thuneihna an chan hma pawhin Afghanistan-a naupang maktaduai 10 chuangte chuan ṭanpuina hi an mamawh tih a sawi.

"Chaw ṭha dawn loh vangin an zinga maktaduai khat vel chu thi mai thei dinhmunah an ding a ni. Thlasik lo thlen hunah phei chuan an dinhmun hi a la chhiat zual ka ring," a ti.