Kuwait-in hmeichhiate sipaia ṭan phalsak

Kuwait sorkar chuan hmeichhiate sipaia ṭan phalsak an ni tawh dawn tih Thawhlehni khan a puang.

Deputy prime minister, defence ministry changtu ni bawk Sheikh Hamad Jaber Al-Ali Al-Sabha chuan ministry-in national military service-a hmeichhiate an luh a phalsak thu hi a puang a ni. A tirah chuan hmeichhiate hi medical field lamah leh military support-ah luh phalsak anni phawt ang.

Deputy PM chuan, "Kuwait hmeichhiate chuan field hrang hrangah an theihna a lo lantir tawh a, hei vang hian mipa ang bawkin sipai lamah an luh pawh pawmsak an ni ve ta a ni," a ti. Kuwati hmeichhiate kum 20 liam ta aṭang khan police officer-a an awm chu phalsak an ni tawh a, sipaia luh erawh phalsak an ni lo a, mahse tunah chuan an tan kawng hawnsak an ni ve dawn ta a ni.

Kuwait sorkar hian field hrang hranga hmeichhiate chanvo pek hun eng emaw chen aṭang khan hma a la ṭan tawh a, kum 2005 khan hmeichhiaten vote an thlakna tur leh, elected office-a an chuh ve theihna turin bill a pass a ni. He bill pass a nih hnuah Parliament member-ah hmeichhe pali chu thlan tlin an lo ni tawh bawk.