US-i'n Mexico leh Canada ramri hawng dawn
United States chuan November thla aṭangin Mexico leh Canada nena a inrina chu Covid vaccine dose bikima la tawhte tan a hawng dawn tih a sawi.
Department of Homeland Security (DHS) chuan thuchhuah siamin, khawmual leh tuipui aṭanga an rama khualzin luh chu an remti tawh dawn tih a tarlang. Kum 2022 January thla aṭang chuan ramri kaltlanga an rama khualzin lut tur reng reng te chu vaccine an la ngei a ni tih finfiahna an neih a ngai ang.
US hian Covid hripui leng vangin kum 2020 March thla aṭang khan an ram ṭhenawm, hmar leh chhim lam aṭanga khualzin luh hi a lo khap tawh a ni. Mahse President Joe Biden kaihhruai sorkar chuan November thla aṭangin vaccine dose bikima la tawh, thlawhtheihna hmanga khualzin luh turte tan khuahkhirhna siam hi a thlahdul dawn ta a ni.
Khuahkhirhna dan an hman mekah hian US khua leh tui ni lo, ni 14 liam ta chhunga UK, China, India, South Africa, Iran, Brazil leh Europe ram danga zinte chu US-ah an luh khap a ni.
Homeland Security Secretary Alejandro Mayorkas chuan zin veivahna lamah him leh kawngmang ṭha zawka dan pangngai anga kal chhoh theihna tura hma lak a ni chu lawmawm a tih thu a sawi a, mahse he dan thar hman ṭan tur ni tak erawh a la sawi lang lo.
US Centers for Disease Control and Prevention chuan kar hmasa khan an rama khualzin lutte chu World Health Organization (WHO) leh US Food and Drug Administration (FDA)-in an pawmpui vaccine an lak ngei a ngai tih a sawi.
US-ah hian Johnson & Johnson, Pfizer-BioNTech leh Moderna siam vaccine te pawm an ni a, WHO hian heng vaccine pathumte bakah AstraZeneca-Oxford, Sinopharm leh Sinovac siam vaccine te a pawm bawk.
Canada ramri hawn a ni dawn ta chu US roreltute chuan lawmawm an tih thu an sawi a, an zingah hian Democrats Senate Majority Leader Chuck Schumer pawh a tel. Schumer chuan "President Biden hian Canada leh US ramri kaltlanga inzinpawh theihna a hawng zau zel hi thil dik tak a ti a ni," tiin ramri hawn chu insumdawnna hrang hrang, damdawi lam inthawnna leh, chhungkaw tam tak tana thu lawmawm tak a nih thu a sawi.
Official-te chuan ramria khuahkhirhna hi thlahdul ni dawn mah se, President hmasa Donald Trump kaihhruai sorkarin a lo tihchhuah tawh 'Title 42' thupek erawh an la hlip dawn lo tih an sawi. He thupek hnuaiah hian Mexico lam aṭanga US-a pem tura luh tumte luh khapsak an ni.
Hripui len tirh aṭang khan US-ah hian coronavirus kai mi maktaduai 42 chuang an awm tawh a, thihpui mi 6,70,000 chuang an awm tawh bawk a ni.