ASEAN palai leh Suu Kyi inhmuh an remti lo

Myanmar rama thu­neihna chang mek sipaite chuan Southeast Asia palaiin an ram a tlawh chu an phalsak a, mahse pawn chhuak thei loa hren mek an ram hruaitu hlui Aun San Suu Kyi a hmuh erawh an remti lo. Suu Kyhi hi thubuai nei mek a nih vangin hmuh an remti lo tih sipai thupuangtu Zaw Min Tun chuan a sawi.

Sipai sorkarin United Nations ambassador atana a ruat a pawmpuina tur UN-in a tihkhawtlai zel chungchangah politics inrawlhah Zaw Min Tun chuan a puh bawk. UN bakah ram leh pawl hrang hrangte chuan international affairs chungchang an buaipuinaah dik taka thilti tura an phut thu a sawi bawk.

Kumin April thlaa Myanmar sipai hotu general Min Aung Hlaing leh Association of Southeast Asian Nations (ASEAN) in Myamnar ram tualchhung buaina tihreh a nih theihna tura hmalakna tur inremna point panga an lo siam tawhte chu a taka kalpui turin ram dangte an nawr mek. Sipai thupuangtu hian ram dangte nawrna avangin Nilaini khan thuchhuah hi siamin, ASEAN palaiin an ram a tlawh chu an phalsak thu hi a sawi a ni. Mahse ASEAN palai Erywan Yusof-a'n sipaite hnena a lo ngen tawh, Suu Kyi hmuh phalsak tura a ngenna erawh chu an remti thei ta lo a ni.

Erywan hian Myamnar-a party hrang hrangte chu a biak thu a lo sawi tawh a, ṭan lam leh politics thila nihna chan tumna emaw a nei lo tih sawiin, Myanmar a zin theih hun tur a nghahhlelh thu a sawi.