Brazil President-in Covid-19 vaccine la duh lo chhunzawm zel

Brazilian President Jair Bolso­naro chuan Covid-19 vaccine lak a tum loh thu a sawi nawn leh a, a hma pawhin Brazil mi zingah he vaccine la hnuhnung ber hi a ni dawn tih a lo sawi tawh a ni.

Far-right hotu Bolsonaro hi an rama coronavirus hripui leng a hma­chhawn danah sawisel a hlawh hle a, hri hi a kai tawh chungin hri leng mek chu sawinep tumin thuchhuah ala siam fo a ni.

"Vaccine la lo turin thuthlukna ka siam a ni. Zirchianna thar ber ka enchhin a, hri do theihna sang tak ka lo nei der tawh, engvangin nge vaccine ka lak ang?," tiin kum 66 mi hian Thawhlehni khan Jovem Pan radio-in an kawmnaah a sawi.

Coronavirus chungchanga rinhlelhna ngah tak Bolsonaro hian Pfizer vaccine la te a nghawng ṭha lo avangin awle (crocodile)-ah an chang thei tih a lo sawi tawh a ni.

Kum 2020, July thlaa Covid-19 a kai hnuah Bolsonaro chuan zir­chhianna an neih hnuah ama taksa chuan hri lakah hian natna do theihna, antibodies tamtak alo neih thu leh vaccine lak a ngaih loh thu a sawi a, hei hi mithiamte chuan an pawmpui lo thung.

Bolsonaro hian Brazil khawpui lian ṭhenkhatin vantlang hmun an tlawh turte hnen aṭanga vaccine la tawhte hnena pek, health pass an phut kher chu na takin a sawisel. "Kei chuan engdang zawng aiin zalenna ka ngai pawimawh ber. Ka khua leh tuiten vaccine an la duh lo a nih chuan a dikna chanvo a ni a, a thu ang chu a ni mai," tiin Bolsonaro chuan a sawi.

Brazil mipui maktuduai 213 zinga maktaduai 100 dawnin vaccine hi dose kimin an la tawh a, mi mtd 50 vel chuan dose khatna an la tawh bawk. Kar hmasa khan ramchhungah Covid-19 thihpui zat hian nuai ruk an pel leh a, United States dawta Covid-19 vanga thi tam berna ram a ni.

Bolsonaro-a'n vaccine a lak duh loh vang hian sawisel a tawh phah ṭhin a, September thlaa UN General Assembly hmang tura New York-a a zin ṭum pawhin ramdang hnen aṭangin sawiselna a tawk nasa hle a ni.