US-in Trump-Kim summit neih theih beisei

US leh South Korea sipaiten South Korea rama joint military drill an neih vangin North Korea chuan South Korea nena high-level meeting an neih tur a ṭhulh phah a, June 12-a US President Donald Trump leh NKorea hotu Kim Jong-un ten meeting an neih tur ṭhulhah a vau bawk. Mahse US chuan Trump-Kim summit neih tur hi kaltlangpui ngei a beisei thu a sawi.

White House thupuangtu Sanders chuan meeting hi neih theih ngei an la beisei reng tih sawiin, hemi atan hian an la inbuatsaih chhunzawm zel tur thu a sawi. President Trump pawh meeting nei tur hian a inpeih tih a sawi a, mahse meeting hi neih a nih loh chuan NKorea nuclear programme titawp tura nawrna chu na zawkin an kalpui tur thu a sawi a ni.

Sanders chuan NKorea-in meeting neih tur a ṭhulh mai thei nia sawi chungchangah NKorea lam aṭang hian eng hriattirna mah an dawn loh thu a sawi bawk.

Hetihlai hian NKorea first vice minister of foreign affairs, Kim Kye Gwan chuan US hian nuclear programme titawp tura che thei loa nawr chep a tum anih chuan, inbiakna neih pawh hian duh lo a, ngaihtuah ṭhat pawh an duh dawn lo niin a sawi. Kim Kye Gwan chuan a bikin nuclear programm titawp nghal tura phuttu US National Security Adviser John Bolton chu sawiselin, Bolton chu President hlui George Bush-a hnuaia a thawh lai pawha mi laktlak loh a ni tiin, a laka an lawm lohnate pawh an thup lo niin a sawi.

Trump-Kim meeting neih tur tihfel a nih hnuah North Korea hian a ram chhunga nuclear test site pawh May thla chhunga khar a tum thu a lo sawi tawh a, a kharna hun buatsaihah pawh foreign expert leh jouranlist-te tel turin a sawm bawk. Pathianni khan US Secretary of State Mike Pompeo pawhin NKorea-in a nuclear weapon programme tihtawp vek a remtih chuan US-in NKorea a hrekna pawh a hlip dawn niin a lo sawi tawh bawk.