Malasyia Police-ten PM hlui chenna in dap

Malaysia Police-te chuan Nilaini zan khan Prime Minister hlui Najib Razak-a chenna in, Kuala Lumpur-a a in an dap a, sorkar sum tam tham tak tichingpena puh a nih kaihhnawihah finfiahna tur document-te an zawng a ni.

Najib Razak hi Nilaini zana moque-a a ṭawngṭai zo a haw hnu lawkah police motor eng emaw zatin a in hi panin an dap nghal a ni. Commercial crime director Amar Singh Ishar Singh chuan police-te chuan PM hlui eirua puhna chhui ṭhat leh tura finfiahna te an zawng niin a sawi.

Razak leh a thurualpuite hi kum 2009-2014 inkar khan 1MBD investment fund tam tham tak ru-ah puhin, investment fund zinga dollar maktaduai 700 zet chu Najib-a bank account-ah dah niin US Justice Department chuan a lo sawi tawh a ni. Hei vang hian a hming a chhiain a larna pawh a tlahniam hle a, mahse Razak chuan tih dik loh a nei lo niin a sawi thung. Sum tichingpena puhna thubuai hi tihtawp ni tawh se, sorkar thar chuan chhui thar leh a tum a ni.

Malaysia Prime Minister thar Mahathir Mohamad a kaihhruai ṭangrual sorkar a din hnunah 1MBD investment fund tihchingpen chungchang hi chhui thar leh turin a ti nghal a, PM chuan finfiahna ṭha a awm veleh he thila inhnamhnawihte chu man an ni dawn tih Nilaini khan a sawi. PM chuan Razak-a kaihhruai sorkarin thil tihsual hi an rin phak aiin a lo nasa niin a sawi bawk.

Mahathir Mohamad chuan sorkarin leiba tam tak a lo neih tawhte rulhna turin 1MBD aṭanga dollar tluklehdingawn tel tihchingpen chu hmuh let leh ngei sorkar chuan a tum dawn tih a sawi. Heng sum tihchingpen tamtak hi Switzerland, US, Singapore leh Luxebourg-ahte a awm a, sum hmuh leh a nih theih nan heng sorkar hrang hrangte pawh hi biakpawh an tum dawn tih a sawi.