Rohingya refugee camp-ah nitin nau piang thar 60 awm

United Nations children’s agency, UNICEF chuan Myanmar aṭanga raltlan, Rohingya Muslim-te awmna, Bnagladesh-a refugee camp-ah chuan nikum August thla aṭang khan nau piang thar 16,000 an awm tawh tih sawiin, nitin nau piang thar hi 60 vel zel awm ang a ni tih a sawi.

Myanmar sipaiten nikum August thlaa Rakhine state-a beihpui an thlak aṭang khan Rohingya Muslim mi nuai sarih dawn chu Bangladesh ramah hian an tlanchhe tawh a ni. A hmaa lo awm sa tawhte nen kumin April thla thleng khan Bangladesh-a Rohingya refugee awm zat hi mi 905,000 vel an tling tawh niin UN chuan a sawi.

UNICEF chuan nikum September thla aṭanga refugee camp-a nau piang thar zinga hmun ngaa ṭhena hmun khat chauh hi damdawi-ina piang niin a sawi a, agency hian nau piang tharte chhinchhiah hna hi a thawk zui bawk a ni. Naute piang thar leh a nu ten ṭanpuina leh enkawlna ṭha an dawn theih nan theihtawp chhuah a nih thu agency chuan a tarlang.