CIA director atan Gina Haspel nemnghet

US President Donald Trump-an Central Intelligence Agency (CIA) director atana a rawt, Gina Hapsel-i chu US Senate chuan pawmpuiin a nem-nghet ta. Haspel-i hi hmeichhe zinga CIA director ni thei hmasa ber a ni.

CIA director hlui Mike Pompeo chu US Secretary of State atana ruat a nih avangin a thlaktu atan hian Trump chuan Haspel-i hi a ruat a, Ningani khan Senate-ah ngaihtuahin vote lak a ni a, President rawtna thlawptu lamah vote 54 tlain, a duh lo lamah vote 45 a tla a ni.

Republican Senator John McCain chuan CIA director atana Trump-a nominee hi a thlawp dawn loh thu a lo sawi tawh a, mahse Ningani-a vote lakah hian Democrats senator parukin Republican president nominee hi an thlawp thung.

Kum 61 mi, Haspel-i hi CIA veteran niin, a hun tam zawk hi undercover officer angin a awm. Kum 2002 khan agency chuan Thailand-a 'black site' enkawl turin a thawn a, he hmunah hian an mi mante hrehawm taka siama thu an zawtfiah ṭhin nia sawi a ni. Kum thum hnuah Haspel-i hian he hmuna mitangte thu an zawhfiah lai video 92 zet chu tichhe turin thupek alo siam tawh a ni.