Nepal party pahnih inchhunfin

Hun rei tak an rel hnuah Nepal-a left party lian pahnih, Communist Party of Nepal (United Marxist Leninist) (CPN-UML) leh Communist Party of Nepal (Maoist Centre) chu an inchhunfin a, Nepal Communist Party tiin an invuah.

CPN-UML Chairman K.P. Sharma Oli leh Maoist Centre Chairman Pushpa Kamal Dahal-te chuan party inchhunfinna tura inremna thuthlung hi an ziak a, Ningani tlai khan Kathmandu-a City Hall-ah press conference neiin party pakhat anga an din tak thu hi an puang a ni.

Inremna an siam hnuah party pahnih central committee-te chu ṭhiah nghal a ni a, Election Commission-ah Nepal Communist Party tiin an inziaklut nghal a ni.

Prime Minister Oli chuan party pahnihte an inchhunfin thei ta chu Nepal ram tana thil chhinchhiah tlak a ni thu sawiin, hei hian ram hmasawnna tura han thawhna kawngah te, retheihna umbo tura hmalaknaahte leh thildangah pawh nghawng ṭha tak a nei dawn a ni, a ti. Inremna an siam angin party thar hi Oli leh Dahal hian an kaihruai ang a, thuneihna inzatin an insem ang a, member pakua awmna secretariat din a ni bawk ang. Party pahnihte an inchhunfin tak vangin CPN-UML kaihhruai sorkar hian parliament-ah two-thirds majority a nei pha tawh dawn a ni.