Joe Biden leh Pope Francis-te Vatican-ah inhmu dawn

Catholic zinga US President ni thei pahnihna, Joe Biden leh a nupui Jill Biden-te chuan October 29 khian Vatican-ah Pope Francis an hmu dawn tih White House chuan a puang.

Joe Biden hi October 30-31 khian Italy khawpui, Rome-ah G20 summit hmang turin a tel dawn a, hemi hma hian Pope nen hian an inhmu dawn a ni. Italy aṭang hian Glasgow-ah COP26 climate change summit hmang turin a zin leh ang.

White House thuchhuah chuan President Biden leh Pope Francis te hian "Mihringte dikna chanvo leh zahawmna kawnga thawhdunna ṭha neih te, Covid-19 hripui leng mek tihtawp dan tur kawng te, khawvel sik leh sa inthlak danglam chak tak chungchangte leh mirethei enkawl dante an sawidun dawn a ni," a ti.

Kum 78 mi, Biden hi Catholic sakhaw vuantu niin, kar khatah vawi khat emaw tal Mass a hmang ṭhin a ni. John F. Kennedy chu Catholic zinga US president ni thei hmasa ber a ni.

Biden hian a thusawiah pawh Bible chang a sawichhawng fo a, kum 2015-a a fapa, thluak cancer natna avanga boral ta in a hman ṭhin Basilica of Our Lady of Guadalupe rosary chu a kut rek veilamah a bun ṭhin bawk.

US President atana Biden lakluh a nih khan Pope hian lawmpuina leh duhsaknate a hlan a, President thar hian a thutlukna chu dikna leh zalenna awmna khawtlang siamna tur ngaituah chung zela a siam a beisei thu pawh a sawi.