Turkey FM leh Taliban palaite'n Afghan chungchang sawiho

Turkey foreign minister Mevlut Cavusoglu chuan Ningani khan Afghanistan-a rorellai, Taliban palaite nen an inkawm a, Taliban-ten rorelna an chan hnuah meeting an neih ṭum khatna a ni.

Afghanistan acting foreign minister Amir Khan Muttaqi kaihhruai Taliban palaite nena an inkawm hnuah Cavusoglu chuan, "Taliban thuneitute chu thurawn te kan pe a, an ram inpumkhatna tura huam zau zawka sorkar an din a ṭul thute pawh kan sawi. Rorelna hmunahte Taliban lam mi chauh ni lo, hnam bil tlem zawk aiawhte pawh an tel a pawimawh thute kan sawiho a ni," a ti. Hei bakah hian hmeichhiate lehkha zirtir leh hnathawh tur siamsak tura an ngen bawk thu a sawi.

"Hei hi khawthlang ramte ngenna chauh a ni lo a, khawvela Islam sakhua vuantute ngenna pawh a ni tel," tiin Turkey minister chuan a sawi.

Turkey hian Kabul aṭangin thlawhtheihna pawh pangngai taka thlawh tir a nih leh theih a beisei thu pawh an sawilang tih Cavusoglu chuan a sawi bawk.

Hetih lai hian Taliban palaite chuan Turkey ram chu Afghanistan-a mipuite chhawmdawl hna thawhna leh, hmasawnna hna thawh hrang hrangahte thawhpui chhunzawm zel turin an sawm ve nghal bawk. Taliban palaite hian Turkey- Red Crescent, Disaster and Emergency Management Authority-te leh Religious Affairs hotute pawh an hmu leh dawn tih Turkey minister chuan a sawi.

Taliban official-te an ram chhung buaina avanga Turkey rama tlanchhiate chu an kir leh duh a nih chuan lo ṭanpui an tiam bawk. Taliban palaite hian Turkey minister an hmuh hma hian US, European ram 10 leh European Union aiawhte chu inbiakna an lo neihpui tawh bawk.