Phillippines-in khualzin khuahkhirhna thlahdul dawn

Philippines chuan China leh ram 40 chuanga hri kai tlemna hmuna Covid-19 vaccine dose bikima la,an rama khualzin rawn lutte chu an inkhunghran a ngai tawh dawn lo tih a sawi.

Khualzinte khuahkhirhna thlahdulna hi President thupuangtu Harry Roque chuan nimin khan a puang a ni.

Roque hian dan tharte chu China leh hri kai tlemna, green list region huamchhung ramte tana siam a nih thu sawiin, he thupek hi October 31 aṭanga hman ṭan tura tih a ni, a ti.

Ram pawn mi, vaccine dose bikima la tawhte'n an ram an chhuahsan hma darkar 72 chhungin RT-PCR swab test-ah an negative ngei ani tih chianna an neih a ngai thung. Philippines an thlenah inkhung hranna hmuna an awm kher a ngai dawn lo a, mahse ni 14 chhung symptom an neih leh neih loh anmahnia inthlithlai reng tura tih an ni.

Vaccine la lo, dose bikima la la lo leh an vaccine lak dan chungchang chhuichhuah mai theih lohte leh an zinchhuah hmaa negative report nei lo te chu ni nga an inkhunghrang phawt ang a ,chumi hnuah RT-PCR test-a an negative chuan an chhuah phalsak chauh an ni ang.

Hri leng vang hian Philippines sorkar chuan kum 2020, March thla aṭang khan ram dang mite tana khuahkhirhna hi a siam a, ram dang khualzinte luh a khap a ni. Special visa neite leh ram dang palaite chauh luh a phalsak ṭhin a, mahse tunah chuan khualzin pangngaite an luh theihna turin an khuahkhirhna siamte a thlahdul dawn ta a ni.