ASEAN summit-ah Myanmar sipai hotu sawm dawn lo

ASEAN group chuan summit an neih turah Myanmar sipai hotu chu telh a ni dawn lo tih an sawi. Hei hi Myanmar sipai sorkarin an ram chhunga buaina leh thisen chhuahna thlengte titawp tura hma a lak tawk loh vang a ni.

ASEAN foreign minister-te chuan kar liam ta Zirtawpni zan khan emergency meeting neiin, October 26-28 a summit an neih turah Myanmar sipai hotu general Min Aung Hlaing chu sawm ve loh turin an rel tih group chair ni mek, Brunei minister chuan a sawi. A aiah non-political palai sawm zawk an rel a ni.

Myanmar sipai sorkarin ASEAN special envoy-in an rama party hrang hrang hruaitute, sipaiten an paihthlak tak Aung San Suu Kyi pawh tela hmuh a dil a chu a hnawlsak avangin an pawl hi an lungawi lo hle a ni.

Kumin April thlaa ASEAN hruaitute leh Myanmar sipai hotuin Myanmar tualchhung buaina thleng mek tihtawp a nih theihna tura hmalakna tur point panga siama inremna an lo siam tawh kha a taka kalpui a ni lo niin an sawi.

US, Britain, Canada, South Korea, New Zealand, Norway leh East Timor ramte pawhin thuchhuah inṭawm siamin, Myanmar ramchhung boruak ṭha lo tak chu an vei hle tih an sawi a, sipai sorkar chu ASEAN special envoy chu ṭha taka lo thawhpui tura an duh thu an tarlang.

Myanmar sipai sorkar, official-a State Administration Council tiha sawi hian kumin February 1-a civil sorkar thuneihna an hnehchhuh hnua ram puma state of emergency a puan chu kum 2023, August thlaa hlih a tiam a, inthlanpui pawh buatsaih a ni dawn tih a sawi bawk.