Haiti-ah US missionary leh an chhungte 17 ru bo

Haiti khawpui Port-au-Prince aṭangin America mi, Kristian missionary leh an chhungte chu Inrinni khan ruk bo an nih thu US media-te chuan an tarlang.

Missionary-te hi fahrah enkawlna hmun an tlawh hnuah rukbo a ni tih New York Times leh CNN chuan an sawi. Washington Post pawhin Ohio-a hmunpui nei Christian Aid Ministries chuan missionary leh an chhungte hi misual pawlin an hreng nia an sawi thu a tarlang bawk.

"Mission field director leh American embassy te chuan hmalak dan tur kawng an dap mek a ni. A rubotu pawlte hi inchhira an inlamlet theihnan leh Isua Krista an rin theihnan i ṭawngṭai pui ang u," tiin Christian Aid Ministries-in audio an tihchhuahah an sawi.

Rukbote hi puilting 14 leh naupang pathum an ni. Croix des Bouquets huamchhunga fahrah enkawlna hmun an tlawh zawh hnuah Titanyen an pan laiin rukbo an ni.

U.S. State Department chuan missionary-te rukbo an nih thu report hi an hre tawh tih sawiin, "Ram pawna awm US khua leh tuite hmakhua leh himna hi Department of State ngaih pawimawh hmasak ber te zinga mi a ni," tiin deparment thupuangtu chuan a sawi.

Ram rethei tak, Haiti ramah hian misual pawlten pawikhawihna thlen ṭhin avangin mi sang telin an chenna hmun an tlanchhiatsan tawh a, pawikhawihna thlengte hian an ram economy thlengin a nghawng nasa tawh hle a ni. Kumin July thlaa President Jovenel Mosie thah a nih hnuah tualchhungah buaina nasa tak a chhuak a, August thla khan lirnghing vangin mi 2,000 chuang an lo thi tawh bawk a ni.