Afghanistan : IS-in mosque-a bomb tipuaktu an ni tih sawi

Afghanistan-a Kan­dahar province-a Shia mosque-a kar liam ta Zirtawpnia thihchilh bomb puak chu Islamic State (IS) firfiak pawl chuan an tih a nih thu an sawi.

Zirtawpnia Imam Bargah-e-Fatima mos­que-a ṭawngṭai inkhawm hmanga mi tam tak an awm laiin thihchilh bomb a puak a, mi 47 an thi a, mi dang 70 in hliam an tuar bawk. Hei hi tun hnaia mosque beih a nih ṭum hnihna a ni a, a hmain Kunduz-a mosque luhna turah bomb tihpuah a lo ni tawh bawk.

United Nations Security Council (UNSC) chuan firfiakten rawng taka mosque-a ṭawngṭaite an bei chu a dem thu a sawi a, pawikhawihtute chu hrem ngei an ṭul tih a sawi. UNSC chuan thuchhuah siamin, pawikhawihna thleng vanga thi chhungte an tuarpui thu leh, hliam tuarte pawh an ṭhat leh thuai an duhsak thu a sawi.

US pawhin mosque beih a ni chu a dem thu a sawi a, Afghanistan mipuite chuan zalen taka awm tur leh, an sakhaw duhthlan zawm a, boruak ṭha tak hnuaia inkhawm turin dikna an nei vek a ni, a ti.