Taliban-ten Afghan hmeichhe naupangte school kal tir thuai tum

Afghanistan ministry of interior affairs chuan an rama hmeichhe naupangte chu secondary school an kal phalsak an ni thuai dawn tih a sawi.

Interior ministry thupuangtu Qari Saeed Khosty chuan school kal leh hun tur hi Ministry of Education-in a puang dawn tih sawiin, "Hun rei loteah university leh school zawng zawngte chu hawn vek an ni dawn a,zirlai hmeichhiate chuan school kal chhunzawmin, zirtirtu hmeichhiate pawhin zirtir hna an thawk chhunzawm leh dawn a ni," a ti.

Taliban-ten Afghanistan-a rorelna an chan hnuah hmeichhe tleirawlte chu zirna boruak ṭha a awm hma chuan anmahni in lama tawm rih turin a ti a, mahse mipa zirlaite leh hmeichhe naupang, primary school zirlaite chu school kal chhunzawm turin a ti thung.

August thlaa Taliban-ten thuneihna an chan khan hmei-chhiate dikna chanvo pek leh zahsaka tiam a, mahse an thutiam anga hma an lak leh loh avangin ramdangte dem leh sawisel pawh an hlawh nasa hle.

United Nations secretary-general Antonio Guterres chuan tun thla tir khan Taliban-te chu international human rights leh humanitarian law hnuaia an intiamna anga Afghan hmeichhiate zalen taka an awm tir loh vangin a dem thu a sawi. "Thutiam bawhchhiatna chuan Afghan hmeichhe naupangte suangtuahna a tichhe thei a ni. Hmeichhe naupang leh puitlingte chuan ngaihpawimawh an phu a ni," tiin UN chief chuan a sawi.

Taliban-ten hmeichhe dikna leh chanvo an peklet duh loh vang hian Qatar leh Pakistan-te pawhin an dem thu sawiin, ramdangte chu Taliban hi inbiakna neihpui turin an ngen a ni.

Qatar foreign minister Sheikh Mohammed bin Abdulrahman Al Thani chuan thla hmasa khan Taliban-ten hma sawn lo a, a hnungtawlh zawnga an chetna chuan a tihrilhhai takzet tih a sawi. Al Thani chuan Qatar chu Muslim sakhua an kalpui danah entawn turin a chah. "Kan kalphung hi Islamic system a ni, mahse sorkar leh zirna in sanga hnathawhna hmunah mipa aiin hmeichhia an tam zawk a ni," a ti.

Pakistan prime minister Imran Khan chuan Taliban-te chuan hmeichhiate zirna chu an khap hlen sak a rin tawh loh thu a sawi a, hemi rual hian hetianga khapna siamsak hi Islam sakhuain a remti lo tih a sawi bawk. "Hmeichhiate'n zirna an dawng tur a ni lo tih hi Islamic kalphung a ni lo a, sakhuana nen pawh a inzawm hek lo" tiin Khan chuan a sawi.