North Korea-in Ballistic Missile kapchhuak : South Korea

South Korea sipaite chuan nimin khan North Korea-in ballistic missile a kapchhuah leh tih sawiin, he missile hi tuihnuai lawng aṭanga kah chhuah niin an sawi.

Ballistic missile hi Sinpo aṭangin peninsula khawchhak lamah kahchhuah a ni tiin Seoul-a Joint Chiefs of Staff thuchhuah chuan a tarlang."South Korea leh US intelligence te chuan thuchiang zawk hriat tumin endikna an nei mek a ni," a ti.

Missile kahchhhuahna Sinpo hi indo lawng chawlhna hmun lian tak niin satellite aṭanga thlalakah pawh submarine-te hi hmuh an ni.

NKorea hian submarine-launched ballistic missile (SLBM) a siam mek niin an ngai a, tuichhungah enchhinna pawh an nei tawh tih an sawi. Hetih lai hian analyst-te chuan submarine ni loin submerged platform aṭanga kahchhuah a nih a rinawm zawk thu an sawi thung.

Nuclear ralthuam nei NKorea hian kar liam ta lawk pawh khan long-range cruise missile, train-launched weapon leh hypersonic warhead nia rin te chu an enchhin leh a, ramdang ngaih ti ṭha lotu lian tak an ni chho mek a ni. An neih ngai zen zen loh weapon exhibition-te neiin, nikum khan intercontinental ballistic missile (ICBM) lian tak chu night-time military parade-ah an lo pholang tawh bawk.

"Hetianga NKorea a chetna chhan ber chu United States-in an inbiaknaa an ngaihdan sawhsawn an tum loh vang a ni. NKorea hian inrunralna lian zawk kalpui an tum tih lantir an duh a ni," tiin Korea Research Institute for National Strategy researcher Shin Beom-chul chuan a sawi. Weapons exhibition a hawnnaah, North Korea ram hotu Kim Jong Un chuan buaina chhuah chhanah US chu puhin inremna mumal tak an siam theih loh chhanah a mawhpuh a ni.