China-in fa enkawl ṭha lo nu leh pa hremna dan siam dawn

China Parliament chuan naupang nunchang ṭha lo leh dan bawhchhiate chu an nu leh pate thlenga hremna tur dan siam a tum.

Family education promotion law siam tuma duan mek a ni a, he dan siam turah hian prosecutor-ten naupang nungchan ṭha loa a ngaih leh, dan bawhchhiate chu anmahni enkawltute zilh hau a, family education guidance programme kaltirna tur siam tel tum a ni.

National People's Congress (NPC)-a Legislative Affairs Commission thupuangtu Zang Tiewei chuan, "Tleirawlte nungchang mawi lo taka an khawsakna chhan tam tak a awm a, a chhan lian ber chu chhungkuaa inzirtirna an dawn loh vang emaw, an dawn tlem emaw vang a ni," a ti. He dan thar an duan hi NPC Standing Committee chuan tunkar hian a ennawn ve leh dawn a ni. Dan thar siam turah hian nu leh pate chu an fate tana chawlh hahdam, infiam leh exercise lak hunte ruahman sak tura tih an ni bawk.

China hian kumin hian thupek khauh zawk lo tichhuak tawhin, , naupangte chu opium ang maia online games an atchilh loh nan te, internet celebrity-te an atchilhnate tihtawp sak a tum a ni. Tun hnaiah education ministry chuan naupang tana games khelh theih hun pawh siamin, Zirtawpni, Inrinni leh Pathianni-ahte online games darkar khat bak khelh a phal lo a ni.

Kar tawp ami atana zirlaite home work pek ṭhinte pawh tihtlem sakin, zirlai naupangte'n zirna lama phurrit an insiam loh nan school ban hnu leh kartawp leh holiday-ahte a hranpaa tuition lak a khap bawk.

Hemi rual hian China hian mipa kum lama la naupang deuhte chu hmeichhia ang maia nu deuha awm lo tur leh mipa (manly) taka khawsa turin a ti. Mipa tleirawlte an nu tur venna atana nikum December thlaa rawtna a lo tihchhuah tawh angin, education ministry chuan school-ah zirlai mipate tan football leh infiamna lam uar turin a chah bawk a ni.