Covid-19 vangin mi 10,000 chuang thi tawh China aiin Italy-ah thihpui tam tawh zawk

Khawvela hri leng mek, Covid-19 vanga thi chu mi 10,000 an chuang tawh. Hri len ṭanna, China ram aiin Italy-ah he hri vanga thi hi an tam tawh zawk a ni. 

Wordometer-in record a tihchhuah thar berah, he thu ziahlai hianw khawvel ram hrang hrangah he hri kai hi mi 247,488 an awm tawh a, an zinga mi 10,064 in an thihpui tawh a ni. Hetih lai hian hri kai enkawl dam hi mi 88,522 an awm tawh bawk. 

a     Italy-ah chuan February 21-a hri kai hmuhchhuah a nih hnuin a darh chak hle a, he hri vanga thi hi mi 3,405 an tling tawh. Nimin thleng khan he hri kai hmuhchhuah hi mi 41,000 an tling tawh a ni. 

a     Spain sorkar chuan Ningani khan an rama hotel zawng zawng kharna thupek a tichhuak. Spain-ah hian hri vanga thi mi 767 an awm tawh bawk a, a kai zat hi 17,149 an tling tawh bawk. 

a     France ramah Ningani khan mi 108  in an thihpui a, he hri vanga thi mi 372 an tling. 

a     Greece ramah hri kai mi 464 an awm tawh a, sorkar chuan hri leng vanga an ram economy-in harsatna a tawh tur venna atan euro tluklehdingawn 10 a dah. 

a     UK sorkar chuan  hri darh zel tur venna atana underground train station te a khar a, khuahkhirhna a siamte kengkawh turin sipai 20,000 a inralrin tir bawk. 

a     Serbia chuan Ningani khan airport a khar a, ramri te kharin internal passenger transport pawh a titawp bawk. 

a     European Union member ramten ramri an khar avangin ei leh in supply kawngah harsatna an tawk chho a, industry-a thawk leh loneituten harsatna an tawk mek. 

a     NATO in Europe-a military exercise a neih chu a titlem a, mahse mission a kalpui te erawh chhunzawm a ni thung. 

a     Germany pawhin a ṭul huna koh theih tura  inring reng turin a sipaite a chah. 

a     Covid-19 kai hmuh, Italian lawnglian chu France chhim lam, Marseille-ah din tir a ni. He lawnga chuang mi 1,400-te chu an test result hriatchian a nih hma chuan lawng chhuahsan phalsak an ni lo. 

a     Ningani khan Croatia, Northern Ireland leh Russia-ah a ṭum khatna atan hri vanga thi an awm. 

a     US-ah mi 13,000 chuangin hri hi an kai tawh a, mi 200 in an thihpui tawh. Hri kai zinga tam zawk hi Washington, New York leh California state a mite an ni. 

a     California governor chuan Ningani khan an state pumah pawn chhuah khapna, 'stay at home order' a tichhuak. California state-ah hian mi 1,000 chuangin hri hi an kai tawh a, mi 18 in an thihpui tawh a ni. 

a     California-a chenna in nei mumal lo mi 60,000 chuang zet chuan he hri hi an kai a hlauhthawnawm nia sawi a ni.

a     Canada prime minister Justin Trudeau chuan nimin aṭang khan US-Canada border khar a nih thu a sawi. 

a     US leh Mexico-in nimin aṭang khan ramri kaltlanga inzin pawh an khap.

a     Haiti sorkar chuan an ramah Covid-19 kai mi pahnih hmuh an nih avangin state of emergency a puang a, ramri a khar nghal. 

a     Mexico-ah coronavirus kai hi ni khatah 46 awmin, nimin khan hri kai zat hi 164 an tling tawh. 

a     Brazil sorkar chuan hri lengin a nghawng buai tur, inhlawhfa mi makta­duai 11 chhawmdawlna tur US dollar tluk­lehdingawn hnih aid package a siam. 

a     Mainland China-ah ramchhung aṭanga  hri inkai hi a zawnin ni hnih an awm tawh lo. Ram dang aṭanga lut mi 39 te erawhin he hri hi an kai tih hmuh a ni. 

a     Wuhan City-a medical team tirh luh belhte pawh lakchhuah ṭan an ni.

a     Thailand-ah nimin khan  hri kai hi mi 322 an tling tawh. 

a     South Korea-ah niminah hri kai thar mi 87 awmin, a kai zat hmuhchhuah tawh hi mi 8,652 an tling tawh. Thihpui zat hi mi 94 an ni. 

a     South Korea, China leh Japan foreign minister-te chuan nimin khan hri leng mek do letna kawnga thawhho dantur sawiin, video conference an nei. 

a     Japan-ah hri kai 970 awmin, he hri hi mi 34 an thihpui tawh. 

a     Malaysia thuneitute chuan Kuala Lumpur-a Muslim inkhawmnaa tel, Rohingya mi 2,000 te chu an dinhmun enfiah tumin zawnchhuah hna a thawk mek. Hri kai mi 670 hian inkhawm­na hmun aṭanga an kai nia hriat a ni. 

a     Australia-in ram dang mi luh a khap a, an ram economy in harsatna a tawh tur ven nan US dollar tluklehdingawn 56 a ruahman. 

a     Saudi Arabia-ah hri kai 274 an awm tawh, vawiin aṭangin ni 14 chhung atan domestic flight, bus, taxi leh rel service tihtawp a ni. 

a     Iran health ministry thupuangtuin an ramah minute 10 danah Covid-19 vangin mi pakhat zel thi ang an ni tih a sawi. Iran ramah hian hri kai hmuhchhuah an nih hnuah mi 1,284 in an thihpui tawh. 

a     Egypt-ah March 31 thleng care, mall, sporting club leh nightclub khar a ni dawn. 

a     Jordan sipaite chuan an ram khawpui chu luh theih loh turin an veng. 

a     Africa-ah kar leh chho aṭangin hri hi a pun chhoh hle rin a nih thu Africa Centres for Disease Control chuan a tarlang. 

a     South Africa chuan Zimababwe nena an inrina chu hung vek a tum. 

a     Algeria ramah public transport titawpin, cafe leh restaurant te khar a ni. Sorkar hnathawk zinga a zahve te chu in lam aṭanga thawk tura hrilh an ni. 

Afghanistan rama Taliban firfiakte chuan an thuneihna rambial china damdawi leh invenna tur thil dawn ve an duh thu Covid-19 do kawnga hmalatute an hriattir. Taliban-te hian Nilaini khan Covid-19 vanga thuchhuah siamin, an thuneihna rambial china an mi leh sa te chu he hri leng laka an him theih nan ṭanpui hna thawktute hnenah, an rambial china damdawi leh invenna tur pe tel ve turin an phut tih an tarlang. 

Ṭanpui hna pe tura lo kalte chu engtin mah kut an thlak dawn loh thu leh him takin an chhuah leh dawn tih Taliban-te chuan an intiam a ni. Khawvelin a buaipui mek Covid-19 hi mihringten Pathian thu an awih loh avanga Pathian tirh a nih thu an thuchhuahah hian an tarlang bawk. 

Afghanistan president Ashraf Ghani chuan Taliban-te ṭanpui a hreh loh thu sawiin, an ram health worker-te chuan an ram chhunga a ṭul lai laiah ṭanpui hna thawk turin a chah. Afghanistan-ah hian he hri kai mi mi 23 an awm tawh a, chung zinga pakhat chu enkawl dam tawh a ni a, thihpui an la awm lo.