Cuba-a thlawhtheihna tlaah mi 110 thi

Khualzin phur thlawh-theihna, Boeing 737 chu kar kalta Zirtawpni khan Cuba khawpui, Havana-a Jose Marti International Airport bulah chesualin a tla. Thlawhtheihnaa chuang mi 110 an thi a, mi pathum an damchhuak. Thi zingah hian naupang panga an tel.

Havana aṭanga Holguin khaw paan tur thlawhtheihna hi airport aṭangin chawhma dar 11-ah a thlawkchhuak a, a thlawhchhuah aṭanga reiloteah a tla a, a kang zui a ni. He thlawhtheihna hi kum 40-a upa a ni tawh a ni. Mexican company Global Air, Aerolineas Damojh tia hriatin Cubana de Aviacion hnena a hmantir a ni.

Thlawhtheihna chetsual chhan hi hriatchian ala ni lo a, chhuizui mek a ni. Cuba President Miguel Diaz-Cael chuan chetsualna thlen dan chhui tur hian special commission din a nih thu a sawi. Boeing chuan a chhuinaah hian theihtawpa a puih tur thu a sawi. Thlawhtheihna black box pakhat chu hmuh a ni tawh a, heta ṭang hian a chetsualna chhan hi

hriatchian beisei a ni.

Cuba sorkar chuan thlawhtheihnaa chesualte hi ni thum chhung sun an nih tur thu Inrinni khan a puang.

Thlawhtheihna chesual aṭanga mi pathum chhanchhuahte hi Cuba mi vek an ni a, an dinhmun erawh a ṭha lo hle nia sawi a ni.

Cuban Council of Churches chuan thlawh-theihna chesuala thi zingah hian evangelical church pastor 20 an tel niin a sawi.