Doctor leh nurse chawl tawhte sawm

United Kingdom-a National Health Service (NHS) a lo thawk tawh ṭhin doctor leh nurse chawl tawhte chu Covid-19 darh zel tur venna kawnga pui tura sawm leh an ni.

NHS-a doctor leh nurse lo thawk tawh ṭhinte hi mi 65,000 chuang an awm tawh a, hengte hi UK-a hri leng beihna kawnga NHS-a thawk lai mekte pui tura sawm leh an ni tih Health Secretary Matt Hancock chuan a sawi. "NHS-a kan hnathawkte hian theihtawp an chhuah a, ram chhunga he hri hi a darh zel loh nan nasa taka hma lak mek a ni. Hmaituamna, maktaduai 2.6 leh hand sanitizer bottle 10,000-te chu ram dang aṭangin lak luh a ni tawh a, hengte hi Pathianni hmain hospital 150-a dah tur an ni ang. NHS-a ventilator dah belhte pawh a awm chho mek bawk," tiin Matt chuan a sawi bawk.

UK-a company 1,400-te chuan ram chhung damdawi-in hrang hranga ventilator dah belh a nih theih nan an company-in ventilator siam hna thawh an hreh loh thu Matt chuan a sawi bawk. Nimin aṭang khan UK hmun ṭhenkhatah chuan school khar ṭan a ni a, hriat theih chinah UK-ah hian Covid-19 vanga thi hi mi 144 an awm tawh a, he hri kai zat hi mi 3,269 an tling tawh bawk a ni.