Venezuela president thar tur thlang

Venezuela president thar tur thlangin nimin khan mipuiten vote an thlak. Hetihlai hian eptu pawl ṭhenkhat chuan inthlan hi an boycott thung.

Dan pangngaiin Venezuela president thlan hi December thlaah buatsaih a ni ṭhin a, mahse kuminah chuan sawn hma a ni. A tirah chuan April 22-ah inthlan hi neih tura tih a ni a, heihi sawn hla lehin May 20 a neih tura tih a ni leh ta a ni. Inthlan kalpui a nih dan hi eptu leh ramdang ṭhenkhatten an sawisel nasa hle a, inthlan pawh hi an pawm dawn lo tih an sawi bawk.

Tun ṭum president thlan-ah hian candidate pali an awm a, mahse candidate langsar pahnihte chu President nilai Nicolas Maduro leh eptu candidate Henri Falcon te an ni. Eptu ṭangrual pawl lian ber chuan candidate an siam lo.

Nicolas Maduro hian kum 2013-a President hlui Hugo Chavez a thih hnu aṭang khan Venezuela president dinhmun a la chelh chhunzawm a ni. Chavez-a policy-te a la chhunzawm a, a campaign-naah an ramin sum leh pai lama harsatna a tawh mek siamṭhat a, ram economy din thar a tiam.

Eptu candidate Falcon pawh hi Chavez-a thlawptu ruh tak a ni ṭhin. Lawyer lar leh state governor hlui a ni a, kum 2010 khan rorellai party aṭanga chhuakin kum 2013 khan eptu candidate Henrique Capriles tan a campaign a ni. Mahse kumin inthlan dawnah eptu pawl aṭang hian chhuak lehin, independent candidate-in president hi a chuh ta a ni.

President candidate dangte chu evangelical pastor Javier Bretucci leh electrical engineer Reinaldo Quijada te an ni a, mahse anni pahnih hi chuan boruak an nei lian lem lo.