Venezuela inthlanah President Maduro a chak

Venezuela President thlanna, Pathianni-a neih takah president ṭanglai Nicolas Maduro chu president kum ruk term chelh chhunzawm turin thlan nawn a ni.

President thlanna neih hi eptu ṭangrual pawl lian ber chuan a boycott a, vote pawh tihchinpen a ni nasa nia sawi a ni. Vote ta hi 46% vel chauh a tling nia sawi a ni bawk. Ram chhung sum dinhmun a tlakhniam nasat avang te, ei leh in lama indaih tawk lohna thleng avangin Venezuela hian harsatna a tawk mek a ni.

Inthlan result puan anih veleh eptu pawl candidate Henri Falcon chuan result hi a pawm loh thu a sawi nghal. Falcon chuan result chu an pawm loh thu leh, inthlan buatsaih ṭhat a ngaih thu a sawi.

Maduro hian vote tla aṭanga 67.7% zet a hmu pha niin National Electoral Council hotu Tibisay Lucena chuan a sawi a, Falcon hian 21.2% a hmu thung. Falcon chuan Maduro a tlin theihna turin vote tihchingpen a ni tih a sawi a, mahse official-te chuan inthlanna hi thianghlim leh felfai taka neih a ni tih an sawi thung.

Venezuela President thlan tur hi eptu pawl lianin a boycott avangin inthlan buatsaih hma hian US chuan result hi a pawmpui dawn lo tih a lo sawi lawk tawh a ni. UN-a US mission chuan inthlan kalpui a nih dan chu democracy zah lohna niin a sawi. EU leh US chuan demcoracy palzut a nih chuan Venezuela chu hrekna siamah an lo vau tawh bawk a ni.

Inthlan hi dan tlangpuiah chuan December-ah neih a ni ṭhin. Mahse Maduro-a thlawptu tamna, National Constituent Assembly chuan a sawn hma a ni. Hei hi eptu ṭangrual, Democratic Unity chuan duh loin, inthlan hun sawn hma chu Maduro-a dinhmun tihṭhat tumna leh, thuneihna a chan chhunzawm zel theihna atana ruahmanna niin an puh. Hei bakah hian Maduro-a khing thei tura candidate langsar pahnih chu inthlanah chuh khapsak an ni bawk.