Saudi Arabi-in Yemen missile kahthlak sak

Saudi Arabia air defence chuan Yemen-a Houthi helte ballistic missile kah chu a ram chhim lama Jazan khaw chungah lo dangin a lo tihchhiatsak niin Saudi kaihhruai Arab ṭangrual ramten an sawi.

Houthi hian nimin khan Jazan airport hi Badr-1 ballistic missile in an kap tih an sawi a ni. Iran thlawp, Houthi helte hian Yemen khawpui, Sanaa an la thunun mek a, tunhnaiah Yemen sorkar thlawptu Saudi Arabia hi missile hmangin ṭum eng emaw zat a lo kap tawh a ni.

Yemen ramah hian kum 2015 aṭang khan tualchhung indona thlengin, Houthi helte hian President Abd Rabbu Mansour al-Hadi kaihhruai sorkar paihthlak tumin an bei a, President hi tlanchhiain Saudi khawpui Riyadh-ah a awm mek a ni. Saudi kaihhruai Arab ṭangrual ramte chuan President Hadi hi thlawpin, Houthi lakah hian beihpui an thlak zui a ni. Iran chu Houthi helte thlawpah leh, ralthuamte pe ṭhinah an puh a, an puhna hi Iran leh Houthi te chuan an pha thung.