Ebola hri leng vangin mi 26 thi tawh

Democratic Republic of Congo ramah Ebola hri a leng thar leh a, hri leng vanga thi hi mi 26 an tling tawh niin health ministry chuan Pathianni khan a tarlang.

Congo President Joseph Kabila leh a cabinet chuan Inrinni khan meeting neiin, Ebola hri leng do letna atana sum dah pawh an tipung a, dollar maktaduai 4 chuang dah a ni tawh a ni. Cabinet meeting chuan Ebola hri leng hmuh tharna, an ram hmarthlang lam bialah a thlawna damdawi enkawlna pek leh, Ebola hri veite an chhungte enkawlna ṭha tak pek pawh an rel a ni.

World Health Organization chuan Congo ramah Ebola hri hmuh thar leh ni mah se, khawvel huapa hlauhthawnawmah ala ngai lo a, health emergency pawh a puang lo a ni. Mahse Congo ramah hri hi a darh zel theihna erawh a sang hle tih sawiin, a ṭhenawm ram pakua-te pawh fimkhur turin a chah nghal a ni. Hemi rual hian hri leng vang hian sumdawnna leh intlawh tawnna lama khuahkhirhna erawh siam lo turin a ti nghal bawk.