Pakistan inthlanpui neih hun atan July 25-27 rawt

Election Commission of Pakistan (ECP) chuan an ram inthlanpui neih hun tan July 25-27 a rawt a, he rawtna hi President Mamnoon Hussain hnenah thehluh a ni.

Rorellai PML-N sorkar hi May 31-ah a term a tawp dawn a ni.

Sorkar term a zawh hnuah caretaker prime minister dah tur chungchang pawh sawiho a ni a, kar hmasa khan Prime Minister Shahid Khaqan Abbasi chuan eptu hruaitu Khursheed Shah pawh a sawipui tawh a, nimin tlai khan meeting an nei leh a ni. Abbasi hian PML-N hruaitu Nawaz Sharif leh Shahbaz Sharif-te pawh a be tawh bawk.

Caretaker prime minister tur hi eptu hruaitu leh prime minister chuan ruatin, an puang dawn a ni. Mahse inremna an siam thei lo a nih chuan mi pathum ve ve an rawt thei dawn a, an mi rawtte hming hi parliamentary committee-ah thlen a ni ang.