Venezuela-a ambassador 14 ko kir dawn

Venezuela President thlanna neih zawh tak chu a fel fai loin a thianghlim tawk lo nia sawiin, Latin America ram 14-te chuan inthlan kalpui a nih dan duh lohna lantirin an ambassador 14-te an ko kir dawn.

Latin America bloc, Lima Group chuan Thawhṭanni khan thuchhuah hi siamin, an ambassador-te ṭheuh hi ko kirin thu an sawipui dawn tih an sawi. Bloc-ah hian Brazil, Argentina, Colombia, Canada, Chile, Costa Rica, Guatemala, Guyana, Honduras, Mexico, Panama, Paraguay, Peru leh Saint Lucia ramte an tel a ni. Member ramte hian an rama Venezuela ambassador awmte pawh koin, inthlan chungchanga an lungawi loh dante pawh an sawipui a ni.

Pathiannia Venezuela President thlanna neihah hian president nilai Nicolas Maduro chu thlan nawn leh a ni a, mahse he inthlan hi eptu ṭangrual pawl lian ber chuan a boycott a ni. Maduro-a khing pha tura ngaih pahnih, Henrique Capriles leh Leopoldo Lopez te chu inthlanah hian an chuh khaphsak an ni bawk.

Ram hrang hrangten Venezuela inthlan hi an pawmpui lo tih sawiin, democracy palzutna niin an sawi. US Vice President Mike Pence chuan inthlan neih tak hi dan kalh nia sawiin an pawmpui loh thu a sawi. Canada leh EU pawhin inthlan result hi an pawmpui loh tur thu an sawi bawk. US hian Maduro leh a thawhpuite hrekna a siam nghal a, hei bakah hian US company-te chu Venezuela sorkar hnuaia oil company hnen aṭanga engmah lei lo turin a ti bawk a ni.

Thuchhuah an siamah, Lima Group chuan inthlan kalpui a nih dan chuan international standard a zawm lo tih sawiin, Venezuela ramchhung dinhmun chu a ngaihtuahawm hle niin an sawi. Lima Group hi Venezuela ramchhunga harsatna thleng chungchang ngaihtuah tura kum 2017 August thlaa din a ni a, June thla hian Peru-ah high-level meeting an nei dawn a ni.

Hetih lai hian Russia, El Salvador, Cuba leh China chuan President Maduro hi lawmpuina an hlan a, China chuan Venezuela mipuite duhthlanna chu zahsak a ni tur a ni, a ti.