Haiti-a misual pawlin US missionary-te tlanchhuah nan Mi pakhatah USD mtd 1 zel an phut
Haiti rama US missionary-te rubotu, misual pawl pakhat 400 Maawzo gang chuan an mi rukbote tlanchhuahna atan hian US sorkar hnenah pawisa an phut a, mi pakhatah USD maktaduai khat zel an phut.
Haiti ram official pakhat chuan hemi chungchang hi sawiin, 400 Mawozo gang hian October 16-a Kristian missionary leh an chhungte mi 17 an rukbo tlanna sum an phut thu hi an hriattir tih a sawi. Christian Aid Ministries pawhin gang hoin mi pakhatah USD maktaduai khat zel an phut tih hi an nemnghet bawk.
Christian Aid chuan missionary leh an chhungte rukbote chhanchhuah a, him taka hruai haw an nih theihna turin an pawl bakah Haiti leh US thuneitute chuan theihtawp an chhuah mek tih a sawi. Rukbo hi America mi 16 leh Canada mi pakhat an ni a, puitlingte hi kum 18-48 inkar niin, naupang pangate hi thla riat mi, kum thum, kum ruk, kum 13 leh kum 15-te an ni. Heng mite hi October 16-a fahrah enkawlna hmun an tlawh haw lam chu misual pawl hian an ru bo a ni.
Ministry chuan heng mite hian ram rethei tak, Haiti-ah hian chhawmdawl hna thawk turin an inpe tih sawiin, missionary-te hian linghing avanga chenna in tan ṭanpuina tur project an buaipui mek a ni, a ti.
Missionary rukbote chhanchhuahna tura Haiti thuneitute thawhpui turin US chuan FBI agent leh Department of State diplomat-te chu Haiti ramah hian a lo tir tawh bawk.
Haiti Justice Minister Liszt Quitel chuan FBI leh Haitian police-te chuan mi rubotute hi an biakpawh tawh thu leh, missionary leh naupangte chhuah zalen an nih theih nan hma an la tih an sawi.
State Department thupuangtu Ned Price chuan US official-te chuan Haiti National Police te bakah missionary group leh rukbo chhungte an biakpawh reng thu a sawi bawk.
400 Mawazo gang hian kumin April thla khan Catholic puithiamte an lo rubo tawh bawk a, tlanchhuahna tura an sum phutte an dawn hnuah puithiam panga, nun pahnih leh an chhungte pathum an hrente chu an chhuah tih Minister Qjuitel chuan a sawi.
Kumin kumtir atanga thla riat chhungin Haiti National Police-te chuan inrukbo chungchang report 328 an dawng tawh a, kum 2020 kumtluana report an dawn 234 aiin a tam tawh zawk.
Haiti ramah hian misual pawlte hian tlanchhuahna sum phutin school naupang, doctor, police officer, bus passenger leh midangte an ru bo fo a, misual pawlte hian thil pawh an tithei tawh hle a, tlanna sum pawh dollar 100 aṭanga maktaduai chuang thlengin an phut ṭhin a ni.