Gates Foundation-in Covid pills siam nan USD mtd 120 thawh dawn

Bill and Melinda Gates Foundation chuan ram rethei te'n Covid dona damdawi thar rang zawka an hmuh theih nan USD maktaduai 120 an invest dawn tih an sawi.

He damdawi, molnupiravir tiha sawi hi US lab Merck siamchhuah niin, he damdawi an ei aṭanga ni rei lote hnuah Covid-19 kai damdawi-in panpui ngai khawpa natna langchhuak chu a zah ve dawnin a tlahniam thei a, hri vanga thihna pawh an pumpelh phah hial thei dawn tih company chuan a sawi.

Gates Foundation aṭanga pawisa rawn lutte hi damdawi siamtu company dangte'n generic forms tam zawk an siamchhuah theihnana hman a ni dawn a, a bikin India rama hman theih turin Merck hian licence a lo pe tawh a ni.

"He inremna hian hmalakna kalpui mek chu nghet zawka a kal theih nan a pui thei dawn a, Covid-19 vaccine tam zawk siamchhuahte, enkawlna leh R&D ṭanpuina hnuaia test neihte, damdawi siamchhuah leh thawnchhuahna lamahte a pui dawn a ni," tiin nimina foundation thuchhuah chuan a tarlang.

He damdawi hi tablet anga ei theih a nih avangin enkawlna awmsa aiin lak a awlsam zawk dawn a, ram retheia mipui vaccine daih khawp hmu zo lo tan remchanna nasa tak a siam belh dawn a, hripui dona kawngah pawh hmasawnna liantak a nih beisei a ni.

Food and Drug Adminis­tration (FDA) chuan United States-a hman atan a him tawk em tih a enfiah mek bawk.

Merck hian an damdawi hi kumin chhungin course makta­duai 10 daih khawp dose an siamchhuah hman an rin thu a sawi. Mahse a hmaa Covid-19 vaccine pek chhuah ang bawkin, ram hausa zawkten chang hmain ram rethei zawkte hlamchhiah an ni leh ang tih hlauthawnna erawh a lian nghal hle.

"Khawvela vaccine supply tam zawkte chu ram hausain an chhuhsak vek a ni," tiin Gates Foundation-a Global Health Division president Trevor Mundel chuan a sawi.

Company dangten generics an siam chhuak thei a nih chuan mipui tan dose tam zawk a awm thei dawn a ni, a ti."Ṭhenkhat chuan thlatin course maktaduai 10 chu awlsam taka an siamchhuah theih an ring. Mahse demand zat leh a man pe tur an hriat hma loh chuan an kaltlang pui dawn lo ni, " tiin hei hi hma an lak a ngaih lehna tur a ni tih a sawi.

Gates Foundation hian heng company te hi an lo ṭanpui tawh ṭhin a, heng company-te hian damdawi awlsam zawk leh senso hautak lo taka siam dan hriain, chung an thiamnate chu generics siamchhuaktute hi an pe tawh tih Mundel chuan a sawi.

Foundation hian mipuiten damdawi chungchang hi an hriat chian theihna atana communication campaign neihna senso pawh a tumsak dawn bawk a ni.